|
תורה אחת יהיה לאזרח ולגר הגר
בתוככם׃
(שמות:יב;מט)
וגר לא תלחץ ואתם ידעתם
את־נפשׁ הגר כי־גרים הייתם בארץ מצרים׃
(שמות:כג;ט)
ושׁמרתם אתם את־חקתי
ואת־משׁפטי ולא תעשׂו מכל התועבת האלה האזרח והגר הגר בתוככם׃
(ויקרא:יח;כו)
וכי־יגור אתך גר בארצכם לא
תונו אתו׃
כאזרח מכם יהיה לכם הגר הגר אתכם ואהבת לו כמוך כי־גרים הייתם בארץ מצרים אני יהוה
אלהיכם׃
(ויקרא:יט;לד)
וכי־יגור אתכם גר ועשׂה פסח
ליהוה כחקת הפסח וכמשׁפטו כן יעשׂה חקה אחת יהיה לכם ולגר ולאזרח הארץ׃
(במדבר:ט;יד)
הקהל חקה אחת לכם ולגר הגר
חקת עולם לדרתיכם ככם כגר יהיה לפני יהוה׃ תורה אחת ומשׁפט אחד יהיה לכם ולגר הגר
אתכם׃
(במדבר:טו;טו)
האזרח בבני ישׂראל ולגר הגר
בתוכם תורה אחת יהיה לכם לעשׂה בשׁגגה׃ והנפשׁ אשׁר־תעשׂה ביד רמה מן־האזרח ומן־הגר
את־יהוה הוא מגדף ונכרתה הנפשׁ ההוא מקרב עמה׃
(במדבר:טו;כט)
ואצוה את־שׁפטיכם בעת ההוא
לאמר שׁמע בין־אחיכם ושׁפטתם צדק בין־אישׁ ובין־אחיו ובין גרו׃
לא־תכירו פנים במשׁפט כקטן כגדל תשׁמעון לא תגורו מפני־אישׁ כי המשׁפט לאלהים הוא
והדבר אשׁר יקשׁה מכם תקרבון אלי ושׁמעתיו׃
(דברים:א;טז)
שׁשׁת ימים תעבד ועשׂית
כל־מלאכתך׃
יום השׁביעי שׁבת ליהוה אלהיך לא תעשׂה כל־מלאכה אתה ובנך־ובתך ועבדך־ואמתך ושׁורך
וחמרך וכל־בהמתך וגרך אשׁר בשׁעריך למען ינוח עבדך ואמתך כמוך׃
(דברים:ה;יד)
ומלתם את ערלת לבבכם וערפכם
לא תקשׁו עוד׃
כי יהוה אלהיכם הוא אלהי האלהים ואדני האדנים האל הגדל הגבר והנורא אשׁר לא־ישׂא
פנים ולא יקח שׁחד׃
עשׂה משׁפט יתום ואלמנה ואהב גר לתת לו לחם ושׂמלה׃
ואהבתם את־הגר כי־גרים הייתם בארץ מצרים׃
(דברים:י;טז)
מקצה שׁלשׁ שׁנים תוציא
את־כל־מעשׂר תבואתך בשׁנה ההוא והנחת בשׁעריך׃ בא הלוי כי אין־לו חלק ונחלה עמך
והגר והיתום והאלמנה אשׁר בשׁעריך ואכלו ושׂבעו למען יברכך יהוה אלהיך בכל־מעשׂה
ידך אשׁר תעשׂה׃
(דברים:יד;כח)
ושׂמחת לפני יהוה אלהיך אתה
ובנך ובתך ועבדך ואמתך והלוי אשׁר בשׁעריך והגר והיתום והאלמנה אשׁר בקרבך במקום
אשׁר יבחר יהוה אלהיך לשׁכן שׁמו שׁם׃ וזכרת כי־עבד היית במצרים ושׁמרת ועשׂית
את־החקים האלה׃
(דברים:טז;יא)
לא־תתעב אדמי כי אחיך הוא לא־תתעב מצרי כי־גר היית בארצו׃
בנים אשׁר־יולדו להם דור שׁלישׁי יבא להם בקהל יהוה׃
(דברים:כג;ח)
לא־תעשׁק שׂכיר עני ואביון
מאחיך או מגרך אשׁר בארצך בשׁעריך׃
(דברים:כד;יד)
לא תטה משׁפט גר יתום ולא
תחבל בגד אלמנה׃
(דברים:כד;יז)
ושׂמחת בכל־הטוב אשׁר נתן־לך
יהוה אלהיך ולביתך אתה והלוי והגר אשׁר בקרבך׃
כי תכלה לעשׂר את־כל־מעשׂר תבואתך בשׁנה השׁלישׁת שׁנת המעשׂר ונתתה ללוי לגר
ליתום ולאלמנה ואכלו בשׁעריך ושׂבעו׃
ואמרת לפני יהוה אלהיך בערתי הקדשׁ מן־הבית וגם נתתיו ללוי ולגר ליתום ולאלמנה
ככל־מצותך אשׁר צויתני לא־עברתי ממצותיך ולא שׁכחתי׃
(דברים:כו;יא)
ארור מטה משׁפט גר־יתום
ואלמנה ואמר כל־העם אמן׃
(דברים:כז;יט)
אתם נצבים היום כלכם לפני
יהוה אלהיכם ראשׁיכם שׁבטיכם זקניכם ושׁטריכם כל אישׁ ישׂראל׃ טפכם נשׁיכם וגרך
אשׁר בקרב מחניך מחטב עציך עד שׁאב מימיך׃
לעברך בברית יהוה אלהיך ובאלתו אשׁר יהוה אלהיך כרת עמך היום׃
למען הקים־אתך היום לו לעם והוא יהיה־לך לאלהים כאשׁר דבר־לך וכאשׁר נשׁבע לאבתיך
לאברהם ליצחק וליעקב׃
(דברים:כט;ט)
עד־מתי רשׁעים יהוה עד־מתי
רשׁעים יעלזו׃
יביעו ידברו עתק יתאמרו כל־פעלי און׃
עמך יהוה ידכאו ונחלתך יענו׃
אלמנה וגר יהרגו ויתומים ירצחו׃
ויאמרו לא יראה־יה ולא־יבין אלהי יעקב׃
(תהלים:צד;ג)
יהוה שׁמר את־גרים יתום
ואלמנה יעודד ודרך רשׁעים יעות׃
(תהלים:קמו;ט)
כי ירחם יהוה את־יעקב ובחר
עוד בישׂראל והניחם על־אדמתם ונלוה הגר עליהם ונספחו על־בית יעקב׃
(ישעיהו:יד;א)
כה אמר יהוה שׁמרו משׁפט
ועשׂו צדקה כי־קרובה ישׁועתי לבוא וצדקתי להגלות׃
אשׁרי אנושׁ יעשׂה־זאת ובן־אדם יחזיק בה שׁמר שׁבת מחללו ושׁמר ידו מעשׂות כל־רע׃
ואל־יאמר בן־הנכר הנלוה אל־יהוה לאמר הבדל יבדילני יהוה מעל עמו ואל־יאמר הסריס הן
אני עץ יבשׁ׃
כי־כה אמר יהוה לסריסים אשׁר
ישׁמרו את־שׁבתותי ובחרו באשׁר חפצתי ומחזיקים בבריתי׃
ונתתי להם בביתי ובחומתי יד
ושׁם טוב מבנים ומבנות שׁם עולם אתן־לו אשׁר לא יכרת׃
ובני הנכר הנלוים על־יהוה לשׁרתו ולאהבה את־שׁם יהוה להיות לו לעבדים כל־שׁמר שׁבת
מחללו ומחזיקים בבריתי׃
והביאותים אל־הר קדשׁי ושׂמחתים בבית תפלתי עולתיהם וזבחיהם לרצון על־מזבחי כי
ביתי בית־תפלה יקרא לכל־העמים׃
נאם אדני יהוה מקבץ נדחי ישׂראל עוד אקבץ עליו לנקבציו׃
(ישעיהו:נו;א)
כי אם־היטיב תיטיבו את־דרכיכם
ואת־מעלליכם אם־עשׂו תעשׂו משׁפט בין אישׁ ובין רעהו׃ ואחרי אלהים אחרים לא תלכו
לרע לכם׃
ושׁכנתי אתכם במקום הזה בארץ אשׁר נתתי לאבותיכם למן־עולם ועד־עולם׃
(ירמיהו:ז;ה)
כה אמר יהוה עשׂו משׁפט וצדקה
והצילו גזול מיד עשׁוק וגר יתום ואלמנה אל־תנו אל־תחמסו ודם נקי אל־תשׁפכו במקום
הזה׃
(ירמיהו:כב;ג)
וחלקתם את־הארץ הזאת לכם
לשׁבטי ישׂראל׃
והיה תפלו אותה בנחלה לכם ולהגרים הגרים בתוככם אשׁר־הולדו בנים בתוככם והיו לכם
כאזרח בבני ישׂראל אתכם יפלו בנחלה בתוך שׁבטי ישׂראל׃
והיה בשׁבט אשׁר־גר הגר אתו שׁם תתנו נחלתו נאם אדני יהוה׃
(יחזקאל:מז;כא)
והיה מספר
בני-ישראל כחול הים אשר לא-ימד ולא יספר; והיה במקום אשר-יאמר להם לא-עמי אתם,
יאמר להם בני אל-חי:
(הושע: ב; א)
סובלנות, אהבת הזולת, שוויון חברתי, וחירות הפרט הם ערכים מן התורה
ועלינו לישמם ללא התפשרות בעם ישראל.
אנו פועלים בשקידה ועושים כל שביכולתינו למען התקיימותם של כל הפסוקים
בתנ"ך
הנוגעים לחזרתם של "פזורי ישראל".
אנו עושים כל שביכולתינו להשפיע בקרב עם ישראל לקבלתם בשוויוניות מלאה
של כל "נדחי ישראל" מכל הזרמים ללא
אפליה.
(המשך;
עוד אודות אהבת-יה)
| 
Love
